Dena prest 22. Euskal Denda izateko

Arbaso, Euskal Herriko Artisautza Tradizionala bizkortzeko elkarteak, Euskal Denda abiatuko du beste behin ere. Urtean antolatzen duen ekitaldi handienak 22 urteko ibilbidea egin du eten barik Durangon; eta hemen da, ostera ere. Bizkaiko Uria euskal artisautzaren erreferente eta epizentro bilakatuko da hain esanguratsua den abenduko zubian; bestalde, erakustoki garrantzitsua ere bada. Durangoko merkatu plaza izango du kokagune, beste behin ere, Euskal Dendak, Euskal Herrian egiten den artisau azoketatik nagusienak. Edizio honek inoiz baino berrikuntza gehiago dakar, eta horrez gain, omenaldia egingo zaie bizitza artisautzari eman dioten aitzindariei.

Aurreko urteetako ildoari jarraituz, Euskal Dendak Euskal Herriko lurralde guztietako ordezkariak izango ditu. Nahiz eta azoka esparruak muga fisikoak dituen, artisau gehiago izango ditugu, guztira 54, Araba, Bizkaia, Gipuzkoa, Lapurdi eta Nafarroatik etorritakoak; iaz baino bi gehiago. Bestalde, bertan izango diren firma askok lehen aldiz parte hartuko dute, 20 profesional batuko dira aurtengora; beraz, hori ere bada berrikuntza. Alegia, artisauetatik % 37k estreinakoz parte hartuko dute azoka honetan, kutxu freskoa eta eraldatzailea emanez.

Lurraldekako parte hartzea dela eta, Bizkaiak izango du ordezkari gehien, hogeita sei artisau. Gipuzkoatik hamahiru etorriko dira eta Nafarroatik zortzi. Arabarrak sei izango dira, iazko kopurua, eta lapurtar bakarra.

Sektorekako sailkapena egiten badugu, aurten, metalgintza, zeramika eta ehungintza dira ordezkari gehien dituztenak, 10, 8 eta 7 tailer, hurrenez hurren. Halaber, aipatzekoa da nekazaritzako elikagaien sektorea, bere lekua egin baitu Euskal Dendan: zazpi aditu ekarriko ditugu.

Bizitza ehunduz

“Bizitza ehunduz” izango da sentimenduz eta emozioz betetako edizioa honetako leloa. Aurtengo Euskal Dendan, Arbasok maitasun handiz gogoratu nahi ditu Juan Unzueta eta Jose Ramon Salmanton. Biak hil dira duela gutxi eta itzelezko hutsunea utzi dute Arbason; izan ere, elkarteak beti aitortu du haien lanaren balioa eta meritua, haien ardura eta dedikazioa. Bizitzaz osoa eman dute biek saskigintzari lotuta.

Aurten, beraz, biak izango ditugu gure artean, euren lanak jarriko baititugu erakusgai Merkatu Plazaren beheko aldean. Halaber, karteleko protagonismoa gaztainondo ehundurak hartu du, eta arestian esan dugun legez, edizio honetarako aukeratu dugun leloak ere gure kide maiteek egindako bidea gogorazten digu, biak izan baitira Bizkaiko saskigintzako adierazle argiak.

Ezin da ahaztu Euskal Dendak bere ateak zabalik izango dituen bost egunetan, zuzenekoa erakustaldi asko egingo direla; helburua baita bisitariak artisautza lanarekin jabetu daitezen. Izan ere, Euskal Dendak beti hartzen ditu aintzakotzat bisitariak, artisautza tradizionalean murgiltzeko asmoarekin. Aurtengo 22. edizioan, bada, are gehiago. Asmoa baita ekoizleak bertatik bertara ezagutzeaz gain, antzinako lanbideak ezagutaraztea eta horietan sakontzea. Horregatik bada, bertan, zuzeneko erakustaldiak egingo dituzte. Beharbada, tailerrak eta erakustaldiak dira azoka hau Euskal Herrian egiten direnetatik berezia egiten dutenak. Beraz, aurten ere, bisitaria ikuslea izateaz gain, pieza bat sortzeko prozesuan parte hartu ahalko du.

Halaber, Euskal Dendaren bost egunetan, “artisau despistatua” lehiaketan parte hartu ahalko dute bisitariek, beraiek izango baitira protagonista eta hautatuko baitute zein izan den erakustoki onena. Bisitarien artean erosketa-baleak zozkatuko dira.